كتبت: عبدالرحمن مؤمن
أكد الدكتور جمال شعبان المتخصص في أمراض القلب والذي شغل منصب عميد معهد القلب القومي في مصر علي ضرورة معرفة أسباب السكتة القلبية، والتوقف القلبي المفاجىء والحذر منها ودعي الجميع عبر منشوره علي الفيس بوك للنشر علي أوسع نطاق حتي تصل الإفادة إلي أكبر عدد من الناس.
وكان نص منشوره علي الفيس بوك الآتي:
كلنا زعلنا إمبارح للرحيل المفاجىء لجراح القلب الدكتور أحمد ماهر رحمه الله في معهد ناصر بالسكتة القلبية
وسط دكاترة القلب اللي حاولوا انعاش القلب لمدة ساعة ونص دون فائدة.
ازاي شباب في العشرينيات أو الثلاثينيات يموتوا فجأة
بالسكتة القلبية او الدماغية، وتجي لهم جلطة في شرايين القلب، أو شرايين المخ، ويعني ايه السكتة القلبية، وهل ممكن وجع البطني كون من مقدمات الجلطة ويعني ايه جلطة المخ ، والسكتة الدماغية، وايه أهم إشارة تحذيرية للجلطات
الجلطة يعني كتلة من خلايا الدم بتتجمع وتلزق في بعضها، وتلزق في جدار الشريان وتقفله، فالدم اللي وظيفته يجري في الشريان، ويروح يغذي الخلايا يتوقف
والخلايا اللي مش واصل لها الدم، تتوقف عن العمل
وقد تتلف وتموت.
نوعين من الخلايا لما بيموتوا مفيش خلايا تانية تعوضهم
وتنمو مكانهم، خلايا المخ وخلايا القلب.
لو الجلطة كبيرة
وفي شريان كبير بيغذي مساحة كبيرة من المخ
ممكن تحصل سكتة دماغية
يتوقف المخ عن العمل
وربما تحدث الوفاة
الكلام نفسه ينطبق علي السكتة القلبية
لما شريان القلب الكبير تتكون جواه جلطة
وينسد انسدادا كليا
يتوقف القلب
وقد تحدث السكتة القلبية
لو لم يتم انعاش القلب
واذابة الجلطة
وتركيب دعامات
هل وجع البطن ممكن يكون سببه جلطة ؟!
ايوه جلطة الشريان التاجي الخلفي
تسبب وجع وحموضة
وحرقان في المعدة
جلطة شرايين الأمعاء
تسلخ وتمدد الأورطي
ممكن تحصل جواه جلطة
ايه اللي يخلي شاب صغير تجي له جلطة ؟!
التدخين
المسكنات
مشروبات الطاقة والمنشطات
المخدرات
تاريخ وراثي بارتفاع الكولسترول والدهون وقابلية التجلط
وطبعا الضغط المرتفع ومرض السكر
وحديثا وأخيرا الإصابة بڤيروس كورونا تسبب جلطات
ايه أهم علامة تحذيرية لجلطة المخ
صداع تنميل في جانب من الجسم اختلال درجة الوعي
علامات تحذيرية لجلطة القلب
وجع أو عدم ارتياح في منطقة الصدر
نهجان خفيف
عرق
ثقل في الذراع الأيسر
هل الوقت يفرق في جلطات المخ والقلب؟!
طبعا الوقت الذهبي الدقايق او الساعات الاولي قد تنقذ حياة الشخص لو تم التدخل بالقسطرة او الادوية التي تذيب الجلطة الكلام دا ينطبق علي المخ والقلب
هل الزعل والتوتر والصدمات العاطفية ممكن تعمل جلطة ؟!
طبعا ممكن تكسر القلب وتؤدي الي اعتلال عضلة القلب ويمكن تتسبب في جلطة في المخ او القلب
هل كوڤيد ١٩ بسبب جلطات ؟!
نعم كورونا المستجد مرض أوعية دموية قد يتسبب في جلطات في القلب والرئة والكبد والكلي والمخ
اسباب اخري للتوقف القلبي المفاجىء في الشباب
اعتلال عضلة القلب الوراثي،واختلال كهرباء القلب.
حفظكم الله من الجلطات واختلال كهرباء القلب
واستعيذوا به من الموت المفاجىء.