حوار: حنان الشامي
مسرحية قمر الغجر عرض درامي مسرحي ثري على مسرح البالون.
ذهبنا لنري هذا العرض الذي حقق نجاحآ باهرآ فى المسرح الغنائي الاستعراضي والذي جاءت مقالات جميع النقاد بالايجابيه العرض الذي كتبه وأخرجه دكتور عمرو دوارة المؤرخ والناقد المسرحي ومؤكد كان معه خيرة المسرحين من المساعدين والاداره المسرحيه ليخرج العمل الضخم هذا بالشكل المبهر الذي استمر ٣٠ ليلة عرض علي مسرح البالون بحضور جماهيري غير مسبوق وكان الحكم هو الشباك الذي حقق إيرادات ضخمه والذي دفع الي تمديد العرض خمسة عشر يومآ اضافيه تلبية لرغبة الجمهور الذي لم يحالفه الحظ فى الحضور نظرآ لافتتاح العرض فى فترة امتحانات نص العام الدراسي وايضآ الطقس الشتوي القارص.
وكان لنا لقاء مع احد مبدعين العرض وهو الاستاذ بطرس عاطف مساعد مخرج بعرض قمر الغجر ودار الحديث التالي :
فى البداية نحب نتعرف علي حضرتك ؟
انا بطرس عاطف عبدالنور فى هيئة اخراج عرض قمر الغجر للمخرج دكتور عمرو دوارة بطولة الفنانه ميرناوليد .
ممكن تكلمنا عن نفسك وبداية فى المسرح كانت ازاي ؟
انا عشقت المسرح من وانا فى سنه رابعه ابتدائي فى الكنيسه عندنا بس كنت خجول جدآ فكنت اقعد اتفرج فى البروڤات بس وكنت انتقد زملائي بيني وبين نفسي واتعصب جدآ لما كنت بلاقي حد بيعمل دوره مش صح من وجهة نظري يعني وافضل اقول كان المفروض يتعمل كده او يعمل الحركه دي مره فى مره بعد ماكنت بتكسف ابتدي يتطلب مني اقري واطلع أمثل الموضوع كبر معايا وعشقت خشبة المسرح .
كان عندك كام سنه لما طلعت اول مره عي خشبة مسرح ؟
كان عندي ١٢سنه تقريبآكنت لسه فى مرحلة ابتدائي وأتذكر اني اخدت احسن ممثل فى الفريق جوه الكنيسه مع انها كانت اول مره أمثل لكن فى الحقيقه كنت بأهل نفسي من قبلها بالحضور كمستمع ومشاهد فقط .
طيب قولت انك أخرجت بالصدفه ممكن تحكلنا ازاي ده حصل وعن اول تجربه اخراج لك ؟
اه فعلا هي كانت بالصدفه احنا كنا معتادين أننا نقدم عرض مسرحي فى كل مناسبه زي عيد الميلاد أو عيد القيامه وكنت فى وقتها فى سنه تانيه ثانوي وملقناش حد كان فاضي يخرجلنا العرض انا وقتها كنت هاوي الاخراج جدآ فى الحقيقيه فالصدفه لعبت معايا دور اني اطلب من المسئول عن النشاط ده فى الكنيسه اقوم بالاخراج ولأن فعلا فى الكنائس بيهتمو جدآ بالمواهب ورغم صغر سني هو وافق واداني الفرصه دي وأخرجت عمل صغير كان حوالي ٢٠دقيقه وقدمته ونال إعجاب كل الحضور ونجح نجاح انا مكنتش متوقعه ومن بعدها بقيت اثقف نفسي فى الاخراج. وااقري كتب كتير وأخرج لفرق كتير جوه الكنيسه .
لكن ده يخليني أسألك هل اكتفيت بالقرايه فى الفن أو الاخراج بصفه خاصه ولا سعيت انك تاخد ورش أو تدرس بشكل أوسع.
انا ساكن فى شبرا الخيمه والمطران بتاعنا اسمه الانبا مرقس مطران شبرا الخيمه مثقف جدآ ودايمآ مهتم بالمواهب وتنميتها ومثمن أهميتها لما لها من رساله متوازيه مع الوعظ والتعليم فأنشآ اكاديميه اسمها أكاديمية الفنون والثقافة فى مطرانية شبرا الخيمه انا قدمت فيها لدراسة التمثيل والإخراج وكان بيدرسولنا اساتذه أكاديميون منهم دكتور عمرو دوارة واستاذه ساميه حبيب وأستاذ فادي فوكيه وكان المدير ابونا القمص مارتيروس فوكيه فاستفدت كتير منها فالحقيقه واثقلت الموهبه اكتر بكورسات وورش خاصه .
يعني افهم من كده أن كل اعمال حضرتك السابقه فى مسرح الكنيسه فقط؟
لا طبعآ البدايه والفضل الاول فى حياتي كان للكنيسه اكتشاف الموهبه وتنميتها كان الكنيسه لها الفضل الأول فيها بصراحه .
لكن ابتديت اشتغل فى مجالات مختلفه بره الكنيسه لاني بصفه. عامه بحب الفن بجميع فروعه فاشتغلت فى بعض الحلقات المسلسله فى قناة سات سڤن كممثل ومنفذ انتاج ومساعد واشتغلت فى بعض برامج قناة معجزه كمساعد انتاج ومنفذ انتاج وممثل فى كليبات وافلام مسيحيه إلي أن أراد الله أن اعمل فى مجال الإنتاج السينمائي أحدهم انتاج مستقل كمساعد مخرج فى بعض الأعمال ومساعد انتاج ومدير انتاج لفليمين والعمل مع مكتب تنفيذ انتاج فترة من الزمن قمنا خلالها بتنفيذ انتاج برامج وافلام وإعلانات كبيره .
وقمت بتأسيس فرقه اسمها ايچبشن بند كان فرقه مسرحيه خاصه ولكن وقفت نشاطاتها من فتره لظروف خاصه واشتركت فى ففرق حره كممثل أو كمخرج.
عاوزه اسالك واحنا دلوقتي عندنا عرض ناجح بكل المقاييس كلمنا عن العرض المسرحي قمر الغجر كواليس عمله فيه وكواليس العمل نفسه؟
قمر الغجر انا بعتبره عمل أو عرض استثنائي بكل المقاييس بداية شغلي فيه طبعا كان عن طريق المخرج وهو دكتور عمرو دواره ودكتور عمرو كان عرفني عن طريق أكاديمية الفنون والثقافة اللي كلمت حضرتك عنها كان بيدرسلي فيها ولانه طبعآ من المسرحيين والنقاد المهمين كان بيحضر لنا عروض كتير داخل الكنائس وبالمناسبه داخل الكنائس عندنا مواهب مشعه بالفن ومواهب جباره وربما لم تلقي الفرصه المناسبه للظهور علي مسارح الدوله فحضرت هنا لمسرح البالون بناءآ علي ترشيح دكتور عمرو دواره وتقابلت مع مدير الفرقه واشتركت معهم .
وماذا عن كواليس عرض قمر الغجر؟
اول نقطه عاوز أشير لها هى نجمة العمل الفنانه ميرنا وليد التعامل معها ممتع جدآ احنا كنا شغالين كأسره متحابه وليس كفريق مسرح بجد الاستاذه ميرنا لما تتعاملي معاها هتحسي انك بتتعاملي مع اختك كان حرفيآ بتنثر الحب بين جميع افراد الفريق واول واحده تلاقيها تتدخل بسرعه لما تحس ان فيه مشكله حصلت .
ده معناه أن كان فيه مشاكل فى الكواليس ممكن تحكلنا عنها؟
بصي اقولك علي حاجه مفيش عمل بيظهر للنور مبيحصلش فيه مشاكل وخصوصآ عمل كبير وضخم زي كده فهو اكيد كان فيه مشاكل لكن المشاكل العاديه اللى ممكن تحصل فى فرقه .
استمتعت بالحوار معاك ويارب من نجاح لنجاح فى النهايه تحب تضيف حاجه .؟
اه انا بقدم كل الشكر للدكتور عمرو دوارة أنه ادني فرصه اني اكون فى هيئة الاخراج بتاعته فى قمر الغجر دكتور عمرو من الأسماء الكبيره فى المسرح المصري اللي شرف ليا أن اسمي يتحط جنب اسمه وكمان فرصه العمل فى مسرح الدوله وبشكر جدآ استاذ احمد الشافعي وكيل الوزارة ومدير البيت الفني علي الدعم الكامل للعرض وكمان استاذ ايهاب فاروق منسق عام العروض بصراحه الراجل ده تعب معانا جدآ وكان معاه عصاه سحريه لحل اى مشاكل تقابلنا وطبعآ بشكر حضرتك جدآ لمجودك وبشكل الجريده العظيمه المسا العربي اللى اتشرفت اني كنتي أحد جنودها فى فتره سابقه
نشكرك ونتمنى لك دائما النجاح والتوفيق فى كل أعمالك.