الموضوع مش مجرد تغيير فى نوع الطياره اللى هتطير فى السماء ده رساله سياسيه واضحه من مدريد لواشنطن بتقول فيها مش هنفضل طول عمرنا تحت جناحك
اسبانيا خدت القرار بعد ما كانت بدأت فعلاً مفاوضات مع شركة لوكهيد مارتن وخصصت جزء من ميزانية ٢٠٢٣ علشان تدخل الصفقة لكن الظاهر إن الحسابات اتغيرت
اللى حصل إنهم اختاروا يحطوا ٨٥٪ من استثمارات الدفاع فى الصناعه الأوروبيه يعنى ببساطه قرروا يدعموا مصانعهم ويبنوا قوتهم بأيديهم مش بس يشتروا من أمريكا وياخدوا تعليمات
ده مش أول تصدع فى العلاقات العسكريه بين أوروبا وأمريكا بس اللى حصل من اسبانيا تحديدًا خطير لأنهم ما قالوش هندور على بديل تانى أمريكى لأ قالوا بندور على مقاتلات أوروبيه
البحرية الإسبانية كمان داخله على خط التغيير وبتستعد تسحب طائرات هارير القديمه وبتجهز لبناء حامله طائرات جديده فى مصانعها الوطنيه
فى نفس الوقت القوات الجويه بتستخدم اليوروفايتر كحل مؤقت لحد ما تطلع مقاتلات الجيل السادس الأوروبيه
اللى بيحصل مش قرار فنى ده قرار سيادى بيأكد إن فيه تحولات بتتشكل فى الخفاء وإن أوروبا مش عايزه تفضل تحت وصاية واشنطن العسكريه طول الوقت
اسبانيا بتلعب دور محسوب وبتبعث رساله للاتحاد الأوروبى كله إن لازم يكون لينا صناعه دفاع حقيقيه مش نشتري ونستورد ونستنى الموافقه
أمريكا بالنسبالها اللى حصل خساره مزدوجه خسرت صفقة ملياريه وكمان بدأت تفقد قبضتها اللى بتمسك بيها سوق السلاح الأوروبى
المرحله الجايه هتشهد إعادة تشكيل لخريطة التسلح والتحالفات والصفقات ووراء كل حركه من النوع ده فيه تقارير استخباراتيه وملفات ضغط ومفاوضات صامته شغاله
والواضح إن مدريد اختارت تلعب لعبة الكبار بمخاطره محسوبه لكنها ممكن تقلب الطاوله على الصناعه العسكريه الأمريكيه لو باقى أوروبا قررت تمشى على نفس الخط
وده معناه إن واشنطن لازم تراجع حساباتها مش بس فى السلاح لكن كمان فى طريقه تعاملها مع حلفاءها اللى بقوا عايزين يبقوا مستقلين مش تابعين